هلووو اني هدى من بابل عمري 25 سنه, شاركت بتحدي ال29 يوم لمرتضى حتى اشجع نفسي وابدي اتعلم التصميم الجرافيكي .
المده جانت قصيره مقارنه بالاشياء الي اتعلمتها , اني شخص دائما يأجل ودائما ابدي بشي واعوفه وارجع احول على شي ثاني اخاف اني افشل بي واحط لنفسي اهواي عراقيل وكلش جنت حابه التصميم واريد ابدي اتعلمه بس مااعرف منين ابدي وماعندي واهس وشفت تحدي مرتضى اجه بوقته واشتركت بي , هذا التحدي علمني اشون احط هدف وخطه وامشي عليها و انظم وقتي واشون مااخاف من انو ابدي اتعلم واحاول لحد مااوصل للي اريده .
الي سويته خلال ايام التحدي :
بمااني مااعرف شي عن التصميم الجرافيكي فااول خطوه جانت اتعلم اساسيات التصميم فااخذت دوره على منصة ادراك .
واخذت دورات على اليوتيوب منها قواعد التصميمم و ودوره تصميم جرافيك
وبعدها بديت اتعلم على برنامج الاليتسريتور واجهت صعوبه بتثبيت البرنامج على لابتوبي لان مو المواصفات المطلوبه وجان كل اشوي يوكف بس استمريت واخذت كورس على اليوتيوب كورس تعلم ادوبي اليستريتور.
وهم كورس على منصة عالم بهاء (تعليم برنامج الاليستريتور).
وبديت اخذ كورس بالفوتوشوب .
هذا شي ملخص للي سويته خلال ايام التحدي من غير الاطلاع على المواقع الي تخص التصميم ومتابعه المصممين وقراءه المدونات ومتابعة كلشي يخص التصميم الجرافيكي .
اقيم نفسي قبل التحدي بالتصميم جنت 0/5 هسه بهاي الايام القليله 4/5 ومستمره بالتعليم لحد الاحتراف ان شاء الله .
جانت فتره التحدي حياه جديد التعرف على ناس جديده طموحه بأمكانيات رهيبه واكتشفنا شغلات عن نفسنا ماجنه نعرفها وماندري نكدر انسويها ,رغم الفتره الاخيره انصابيت بكورونا بس كدرت اكمل واتابع ,وانو حتلو شكد عندك التزامات تكدر توازن بينهن , هاي مو النهايه هاي بداية طريق التعلم .
بالنهايه ممتنه لمرتضى على هذا التحدي وعلى كلشي سواه النه ,ومممتنه كلش للابطال الي مشاركين بالتحدي الي كل مااكسل بس اشوفهم ينطوني حافز وايجابيه حتى استمر .
وشكرا لفريق مرتضى على تعبهم ويانه .
